Maiatzaren 9an Europaren Eguna ospatzen da. "Europar Batasunak, europarron proiektu amankomunak, gure kontinentera bakea, giza eskubideak eta ongizatearen gizartea ekarri ditu XX. mendearen lehen erdian Europako lurretan gertatutako izugarrikeriak, gerrak eta gorrotoak, gainditzeko helburuarekin", esan dute Alkizako udal ordezkariek..
Aitortu dute Europar Batasunaren egungo proiektuak ez dituela betetzen osorik euren nahiak: "Gabezia nabarmenak ditu, arrazoi ekonomikoak nagusitzen zaizkie arrazoi sozialei eta estaturik ez dugun naziook ez gaude behar bezala errekonozituak. Ezin da ukatu, bestalde, onura nabarmenak ekarri dizkigula, hala nola, mugak desagertzea, euroa, Erasmus moduko programak edo roaminga bukatzea".
Era berean Alkizako udal ordezkariek esan dute, nazio bezala aurrera egin eta demokraziaren, bakearen eta giza eskubideen balioei eta ongizate estatuari eutsi nahi bazaie, europar proiektu amankomuna dela bermerik handiena gaurko mundu globalizatuan helburu horiek lortu ahal izateko.
Hori guztia dela eta, Europaren Eguna ospatzekoa dela uste dute eta ospakizun hori gauzatzeko udalak erabaki du udaletxeko balkoian urtero maiatzaren 9arekin herri-nortasuna adierazten duten hiru banderak zintzilikatzea: herrikoa, ikurrina eta Europakoa.