Mundu mailako mugimendu artistikoa da Slow Art Day, Phil Terryk 2009an sortua. Urtero, apirilean, artea begirada motel baten bidez esperimentatzeko ekitaldiak antolatzen dira mundu osoko museo eta arte-galerietan. Publikoari poza aurkitzen laguntzea da ekimenaren helburua, pinturak edo eskulturak patxadaz behatuz, eta haien inguruan eztabaidatuz.
Hain justu, hori ari dira egiten, gaur, Alkizako Ur mara museoan. Bertako nahiz nazioarteko artista ezberdinak gerturatu dira bertara, bakoitza bere lanekin, haiek aurkeztu, gainerakoenak behatu eta elkarrekin iritziak nahiz hausnarketak partekatzeko. Besteak beste, Bea Gonzalez Rojo, Idoia Iturri eta Diana Vasina margolariak edota txotxongiloekin aritu den Corrado Massaci izan dira museoko arte-negutegian kokatu duten erakusketan. Gainera, Maria Giró Coll artista eta kultur bitartekari kataluniarrak, Jose Perez Ocañak 1983an Alkizako eskolako haurrekin egindako eskultura aurkeztu du.