Fagus Alkiza interpretazio-zentroak gure inguruko txoriak eta hauen kantuak ezagutzeko ibilaldia antolatu du apirilaren 17rako. Mikel Olano basozainak egingo ditu gidari lanak.
Alkizako plazan 10:00etan egingo dute hitzordua eta 30 minutuko aurkezpena egingo da bertan, txorien argazkiak pantaila handian ikusiz eta haien kantuak entzunez. Ondoren, ibilaldia hasiko da, antolatzaileek jakinarazi dutenez zailtasunik gabekoa. Prismatikoak eramatea gomendatzen da. Bi ordu inguruko iraupena izango du saioak eta adin eta ezaguera maila guztikoentzat egokia izango da.
Ezinbestekoa da aurrez izena ematea. Horretarako, izena emateko eta informazio gehiagorako honako telefono zenbakia eta korreoa daude bisitarien eskura: kultura@alkiza.eus eta 688 60 44 66. Bost eurokoa izango da prezioa pertsonako eta alkizarrek eta 12 urtez azpikoek doan izango dute. Saioa euskaraz izango da.