Ekainaren 30ean ohiko osoko bilkura egin zuen Alkizako Udalak eta Deustuko unibertsitatearekin lankidetza hitzarmena onartzearekin batera, herriko ostatuan eta Inazio Urruzola txakolindegian erabiltzeko kontsumo bonuak banatzeko erabakia hartu zuten udal ordezkariek.
Bonu bakoitzak 10 euroko balioa izango du eta establezimendu horietan otordua egiteko erabili ahal izango dira, 2020ko abenduaren 31ra bitartean. Udal ordezkariek adierazi dutenez, bi helburu dituzte bonuek: "Herriko eragile ekonomikoak laguntzea krisiaren ondorioak gainditzen eta, herriko festarik egingo ez denez, herritarrei nolabaiteko konpentsazioa ematea. Herriko festetako aurrekonturen zati bat erabiliko da bonuak finantzatzeko".
Bestalde, udalak jakinarazi duenez, asmoa du gainerako herriko eragileak laguntzeko bestelako ekimenak bultzatzeko urtea bukatu baino lehenago.