Triskantza "handi xamarra" izan da, Koldobika Jauregi Ur mara museoko arduradunaren arabera. "Igandean beste kristal bat puskatu zutela sumatu genuen, baina umekeri bat izango zela pentsatu genuen. Atzo arratsaldean, ordea, eskultura bat errotik bota zuten, erakusleiho baten kristalak puskatu eta lokatzez zikindu zituzten bazterrak. Harrituta gaude".
Egun argiz egin zuten erasoa. Ur marako arduradunak larunbatean egingo duten ekitaldi bat prestatzen ari ziren museoaren bestaldean eta ez ziren gertatutakoaz jabetu. "9 urtetan ez zaigu horrelakorik pasa", esan du Jauregik. Ingurune natural batean dago kokatuta espazioa, toki irekia da eta horregatik erasoa gaitzetsi du Alkizako eskultoreak eta "kontzientzia" eskatu die horrelako ekintzak egiten dituztenei.
Azken orduotan jendearen babesa jaso dutela aipatu du Ur marako arduradunak, eta dagoeneko museoa lehengo egoerara bihurtzeko lanean ari direla aipatu du. "Ia dena konpondu dugu. Aurrera egin beharra dago".
Argazkiak: @inakiXabier