Gizakia eta naturaren arteko harremanaz gogoeta egiteko aukera, Alkizan

Alkizako udalerriaren zati handi bat Natura 2000 Sarearen barruan aurkitzen da, Hernio-Gazume Kontzerbazio Bereziko Eremuan (KBE). Naturagune honek udalerriaren azaleraren %44 hartzen du, eta udal ordezkarien ustetan, «indargune bat da, herriaren garapenerako tresna». Gizakia eta naturaren arteko harremana «ia guztizko axolagabetasunera» pasa dela uste dute udal arduradunek, eta lotura hori berreskuratu eta indartzeko lanean ari dira azkeneko hamar urte hauetan. «Aurreko belaunaldiek ingurunearekiko harremana ulertu eta bizitzeko zuten modu bereziari esker, arbasoengandik oinordekotzan jaso duten ondare natural paregabea estimatu eta zaintzea erabaki dute Alkizan bizi direnek».

Udalak, herritarrek eta herriko eragileek, eskualdeko eragileekin batera abiatutako gogoeta hori Fagus Alkiza Interpretazio Zentroan gauzatu da. Bost urte dira, ofizialki, Hernio-Gazume kontserbazio bereziko gune izendatu zutela. Urtemuga hori dela eta, Alkizako Udalak Naturtzaindia elkartearekin batera, jardunaldi zientifikoak antolatu ditu bihar eta etzi, Donostian eta Alkizan, hurrenez hurren.

Bihar, 19:00etan Donostiako Aquariumean egingo da lehenengo solasaldia: Bioaniztasunaren alde egindako tokiko ekarpen baten adibidea izenburua eramango du eta Jon Umerez Alkizako alkatea, Jorge Gonzalez Naturtzaindiako kidea, Joaquin Araujo idazle eta naturalista eta Jordi Sargatal naturalista eta ingurumen dibulgatzailea ariko dira azalpenak ematen. Aitor Elduaien izango da moderatzailea.

Etzi, berriz, larunbatarekin Fagus Alkizara bisita gidatua egingo da. Naturtzaindia elkarteak herrian gauzatu dituen esku hartzeak ezagutzeko ibilaldia egingo da eta Joaquin Araujo eta Jordi Sargatal ariko dira gidari lanak egiten. Udaletxeko goiko solairuan dago Fagus Alkiza zentroa eta etziko hitzordua 11:00etan egin dute.

JARDUNALDI ZIENTIFIKOAK