Gaur egin dute erakusketaren inaugurazioa, eta Koldobika Jauregik eman ditu azalpenak. Markant belgikarrak sortutako esaldi edo aforismoei gero obra grafikoa gehitu dio Dad.g artista frantsesak. Jauregik azaldu duenez, monotipoak dira ikusi daitezkeen obrak: "Plantxa bat tintaz betetzen duzu eta gero hortik kentzen zoaz tinta nahi duzun marrazkia sortu arte. Ondoren, paper bat jartzen duzu plantxaren gainean eta inprimatu egiten da. Monotipoa deitzen zaio normalean ale bakarra ateratzen delako". Jauregik erakusketaren "freskotasuna" nabarmendu du, eta horrelako obrak normalean hemen ez direla ikusten gaineratu du.
Erakusketari buruzko azalpenak eman ondoren, Hillbilly Jokers taldearen kontzertua entzuteko aukera izan dute Ur marara joan direnak. Erakusketa bi astez egongo da ikusgai.
Ur mara museoan egingo den hurrengo ekitaldia irailaren 1ean izango da. Sara Moranteren ilustrazioak ikusi ahalko dira erakusketa berri batean. Inaugurazioa 20:00etan izango da, eta ondoren aktuazioa egingo dute SK efimeroak-ek, hau da, Susana Cencillok eta Koldobika Jauregik, musika, performancea, dantza eta bideoa uztartuz. Gero, 22:00etan, Community food egingo da.
Irailaren 15ean hitzaldi bat izango da, Thoreau inguruan izenekoa, Antonio Casado da Rochak emana. 18:00etan hasiko da hitzaldia eta ondoren Emekuartet-en kontzertua izango da. 21:00etan Community food egingo dute.