Tantatik elkarteak eskainitako tailerrean parte hartzaile bakoitzak bere buruhandia egin ahal izan zuen. Gero, iraila hasieran, herriko festetan, buruhandi hauek ateratzea da asmoa.
Ostiralean jarraituko du kultur asteak, eta 18:30ean elizan, musika eta dantza ikasleen ikasturte amaierako emanaldia izango da. Lehenagotik, ordea, 17:30ean, Gema Arrugaeta argazkilariaren erakusketa inauguratuko dute Fagus Alkiza zentroan.
Gema Arrugaetak naturarekiko eta bidaiekiko grina berezia du eta hori bere lanean agerikoa da. Esperientzia handia du munduko hainbat paisaia, herrialde eta kulturatan. Esate baterako, lan ugari eginak ditu honako tokietan: Peru, Bolivia, Amazonas, Norvegia, Suedia, Laponia, Danimarka, Italia, Maroko, Tanzania, Tibet eta Sri Lankan.
Natura eta gizarte gaiak ardatz dituzten sei libururen egilea da eta hamahiru dokumental egin ditu askotariko formatuetan. Bere ibilbide profesionalean zehar 170.000 argazkitik gora atera ditu eta horien guztien artean aukeraketa bat egingo du argazkilariak, Fagus Alkizan jarriko duen erakusketarako.
Ekainak 22, ostirala
17:30. Gema Arrugaeta argazkilariaren erakusketaren inaugurazioa Fagus Alkizan.
18:30. Elizan musika eta dantza ikasleen ikasturte amaierako emanaldia. Pianoa, dultzaina, trikitixa, gitarra, biolina eta dantza ikuskizuna.
Ekainak 23, larunbata
17:00. Alkizako Txirrindulari Igoera. Anoetatik, Azken Portutik abiatuta bost kilometroko igoera 16 urtetik beherako federatu gabekoentzat.
18:00. Alkizako kilometro bateko igoera 10 urtetik beherakoentzat, Bentzala baserri paretik hasita.
Iluntzean. San Joan sua piztuko dute herriko plazan.