Arte diziplina ezberdinek bat egin nahi izaten dute ekintza artistiko honetan eta aurten lamien gaia hartu dute hizpide. Aurreko edizioak Arantzazuko santutegian ospatu badira ere, aurten Alkizara ekarri nahi izan dute.
Goizean umeentzako arte tailer irekia egin da eta eguerdian Juan Kruz Igerabideren txanda izan da. Gaztetxoek prestatu dituzten lanak proiektatuz lamien inguruko kontakizuna egin du, eta bide batez, Xabier Lete eta Lourdes Iriondok bere garaian biniloan lamiei buruz egindako grabazioa jarri du. Eguerdira artekoak hor bukatu dira.
Arratsaldean, Aiko taldearen eskutik dantza saio irekia izango da eta iluntzean, 20:00etan Lamiaren zubia ikuskizuna izango da elizan. Susana Cencillo akordeoilariarekin batera organoan arituko da Ana B. Garcia. Iraitz Lizarragak lamien inguruko perfomance bat egingo du eta Koldobika Jauregik ekintza artistiko efimero bat burutuko du bertan. Sarrera irekia izango da.