Urtez urte postuen kopuruak gora egin du Alegiako azokan, eta aurtengo edizioan inoiz baino gehiago izan dira. Guztira, 48 postu bildu dira Alegiako XIX. Artisau eta Nekazal Azoka Berezian. Orain arte udaletxeko plazan ospatu izan da azoka, baina postu kopurua dela-eta, ez zen kabitzen bertan, eta eskolan egin dute lehen aldiz.
Denetariko postuak ikusi ahal izan dira bertan; eskualdeko zein kanpoko artisau eta nekazariek parte hartu dute. Merkatuaz harago, herriko talogileek ere postua jarri dute, eta pintxoak ere saltzen aritu dira gaztetxoak. Giro ederra izan da aurtengoan eta jendetza bertaratu da azokara.
