Hondoaz galde. Biderako sintesiak liburuaren aurkezpena eta Sutarri dantza taldearen ikasturte amaierako emanaldia izango dituzte, hurrenez hurren, bihar eta etzi Alegian.
Aipatu liburua elkarlanean ondu dute Mikel Artola alegiarrak eta Jon Sarasua irakasleak, eta bihar aurkeztuko dute Gaztetxean, 18:00etan. Bien arteko elkarrizketen eta hausnarketen emaitza da liburua, eta irakurlea gogoeta egitera gonbidatzen dute, besteak beste, bizitzaz, espiritualtasunaz eta gaur egungo erronkez. Jarduera elkarlanean antolatu dute Gaztetxeak eta Intxurre elkarteak, eta herritar guztiak gonbidatu dituzte.
Egindako lana ikusgai
Ostiralean, berriz, ikasturtean egindako lana erakutsiko du Sutarri dantza taldeak. Elorri frontoian izango da emanaldia, 22:00etan, eta adin zein maila askotako kideek euskal dantzak egingo dituzte. Bertan erakutsiko dute kultur ondarea mantentzeko egin duten lana.