Atzo, Alegian sartu orduko nabari zen egun berezia zela. Artolaren aldeko animo mezuz beteta zeuden etxeetako balkoietan jarritako kartelak. Herriko kaleetan gorri kolorea nagusi, eta ehundik gora pilotazale autobusaren zain. Goizean, hiru autobus joan ziren Iruñera; arratsaldean joan zen laugarrena eta azkena. Ilusioz eta gogoz zeuden zaleak, etxera txapelarekin itzultzeko itxaropenarekin.
Bazirudien herria hutsik geratuko zela, baina ez zen halakorik gertatu. Bertan geratu ziren alegiarrek leporaino bete zuten plaza, finala bertan jarri zuten pantailan zuzenean ikusteko; zenbaitek, aurrena bazkaria egin zuten Intxurre elkartean. Oihu eta txalo artean animatu zuten herriko pilotaria; zirrara eta tentsioa nabari zen zenbait unetan. Artolak, ordea, ezin izan zien garaipena oparitu. Iluntzean, hala ere, merezitako harrera egin zioten txapeldunordeari.
Bertsoak eta afaria
Lehenik, ekitaldi xumea egin zuten plazan, eta nola ez, tartean bertsoak entzun ziren. Batetik, Artolak berak kirol lehiari buruz idatzitako Galdu ta irabazi bertso sortako bi bertso kantatu zituzten herritarrek. Bestetik, Gipuzkoako Herriarteko Bertsolari Txapelketan parte hartu duten hiru herritar gazte oholtzara igo ziren. Azkenik, Artolak berak eta Iker Iriarte botileroak ere bota zuten bertso bana. Ondoren, 325 lagun bildu ziren pilotalekuan, elkarrekin afaltzeko.