Joan den urteko ekainaren 13an izandako uholdeek eragindako kalteak konpontzeko lanak hasi dituzte Alegian.
Herriko bost eremutan egingo dituzte lan horiek, hain zuzen, Etxe Txuriko bidean, Galarreta bidean, Txagalde bidean, Sagasti bidean eta Aldabako bidean. Lanak dagoeneko hasi dituzte, eta ekainaren 30erako amaitutzea aurreikusten dute.
Kaltea eskualdean
Iazko ekaineko eurite hark Alegian ez ezik, kalte larriak eragin zituen eskualdeko beste zenbait herritan ere, horien artean, Altzo, Berrobi, Ibarra eta Ikaztegieta.
Hain zuzen, Ikaztegietan bi baserritara —Txarako borda eta Larrunbe txiki— joateko bideak erabat moztuta geratu ziren uholdeen zein luizien eraginez. Bat-bateko ur erauntsi hark kezka sortu zuen azpiegituren inguruan, batez ere, ea landa eremua prest dagoen halako ezbeharrei aurre egiteko.
Gipuzkoako Foru Aldundiak milioi bat euroko kalteak zenbatu zituen ezbeharra gertatu eta bi astetara; eta iazko irailean 1,2 milioi euroko partida onartu zuen udalei laguntzeko.