Hasi dituzte Langaurreko aisialdi gunea egokitzeko lanak. Otsailaren hasieran iragarri zuen Alegiako Udalak ingurua egokitzeko zenbait lan egingo zituztela, eta azken egunetan belarra mozten zein beste zenbait egokitzapen lan egiten aritu dira.
Udaletik aurreratu dute «epe motzean» zenbait azpiegitura ere jarriko dituztela, erabiltzaileek «eremuaz gozatu» ahal izateko. Finean, hurrengo lanak gauzatzea aurreikusten dute: irisgarritasuna hobetzea; komunak eta haurrentzako jolasgunea eraberritzea; eremuko altzariak, parrillak eta «antzeko elementuak» berritzea; eta Sagastigainetako Borda eraberritzea.
Aipatutako lanek 111.000 euroko aurrekontua izango dute, eta Europako Batasunak finantzatutako Berreskuratze, Eraldaketa eta Erresilientzia Planaren (Next Generation-EU) esparruan gauzatuko dituzte, zehazki Tolosaldeko Turismo Jasangarriko Planaren 2. Ardatzeko (Efizientzia Energetikoaren hobekuntza) 1.jarduketa (Tolosaldea oinez eta bizkiletan) gauzatzearen barruan.