Alegiako Boskatu taldeak agur esan dio Gipuzkoako Herriarteko Bertsolari Txapelketari, eta, ondorioz, ordezkaririk gabe geratu da Tolosaldea aurtengo edizioan. Alegiarrak Tolosaldea ordezkatuz heldu dira final-laurdenetako kanporaketara, baina ezin izan dute aurrera egin.
Joan den ostiralean jokatu zuten Zaldibian finalerdietako kanporaketa, Zumarraga-Urretxu 1 taldearen aurka. 100 bertsozale inguruk bete zuten herri antzokia, eta honako bertsolariak aritu ziren kantuan: Antton Fernandez, Manex Mantxola eta Mikel Iturriotz Zumarraga-Urretxuko taldean, eta Iker Iriarte, Iker Arandia eta Eneko Ontsalo Boskatu taldean. Leire Akizu izan zen gai-jartzailea.
Oso parekatua izan zen saioa. Ariketaz ariketa, ale ederrak entzuteko aukera izan zen, eta ikusleentzat ez zen erraza izan talde irabazlea iragartzea. Azkenean, 16-14 gailendu ziren goierritarrak.
Gauzak horrela, maiatzaren 16an Tolosan jokatuko den finalaurrekoan arituko dira goierritarrak; Hernani edo Txingudi-A taldea izango da haien aurkaria –ostiralean Hernanin izango den final-laurdenetako kanporaketan erabakiko da–. Finala, berriz, Aian izango da, maiatzaren 30ean.