Alegiako Txintxarri abesbatza elkartearen ekimenez, aurten ere herritar talde bat kalean abesten ariko da otsailaren 4an, Santa Ageda bezpera izango dela-eta. Egun horretan abestuko dituzten kantak prestatzeko entsegua ere antolatu dute, hain zuzen, gaur, 20:00etan, herriko kultur etxean.
Santa Ageda bezperan herritarrekin batera ariko dira koplak kantatzen Xabat Illarregi —Nafarroako Bertsolari Txapelduna— eta Iker Iriarte herriko bertsolaria; eta, antolatzaileen arabera, herriko bertso eskolako bertsolariek ere botako dute «koplaren bat edo beste». Hori gutxi ez, eta bidean lagun izango dituzte herriko akordeoi-jotzaileak eta trikitilariak.
Santa Ageda egunean, otsailaren 4an, 18:00etan abiatuko da taldea Larraitz auzotik.