Suziriak piztuta bidera atera zaizkie laguntzaileak Errege Magoei. Autoz egin dute herrian zeharreko bidea, kapotarik gabeko kotxean. Desfilera batu zaizkie Jose eta Maria Jesus haurtxoarekin, eta erregeen atzetik gaur gauean banatzekoak dituzten opariak joan dira; baita gaizki portatu direnentzako ikatza ere.
Alegiako hainbat auzo zeharkatu eta goxokiak banatu ondoren plazan bukatu dute ibilbidea. Errege Magoek Jesus haurrari urrea, intsentsua eta mirra oparitu dizkiote eta, ondoren, udaletxeko balkoira igo dira. Herritarrak agurtu ondoren, banan-banan jaso dituzte Alegiako umeen gutunak.