09:00etan Alegiako MTB zirkuituak ezagutzeko enduro martxa egingo dute. Behin hori amaituta, 14:00etan parrillada izango da plazan parte hartzaile guztientzat eta ondoren zinta karrera egingo da opariekin. 16:00etan haurrentzako ginkana batekin osatuko da egitaraua.
Bihar bukatuko da I. Txupitxu Enduro Martxan izena emateko epea. Izan ere, parte hartzeko derrigorrezkoa da izena ematea. Interesatuek Rockthesport.com webgunearen bitartez egin dezakete, eta prezioa 20 eurokoa da. Ez da lehiakorra izango, beraz, ez da sailkapenik izango. 09:00etatik 13:00etara bitartean izango da ekitaldia, eta aseguruak ordutegi horretan bakarrik estaliko ditu istripuak. Ordutegi horretatik kanpo, antolakuntza ez da gertatutako ezbeharren erantzule izango.
Martxaren segurtasun arauei dagokienez, kasko homologatua erabiltzea derrigorrezkoa izango da ibilbide osoan zehar, eta belaun-babesak eramatea gomendatzen dute. Bestalde, parte hartzaile bakoitza arduratuko da bere bizikletaren egoera teknikoa egokia dela ziurtatzeaz. Ibilbidean jarriko diren seinaleak eta antolatzaileen jarraibideak zorrotz bete behar direla jakinarazi dute, eta ez betetzeak zigorrak edo martxatik kanporatzea ekar dezakeela. Antolatzaileek gaineratu dutenez, ibilbidea behar bezala seinaleztatua egongo da kartel, zinta eta markekin, eta GPS track bat deskargatzeko eskuragarri egongo da.
Martxa ingurune naturalean egingo dela ekarri dute gogora. «Ingurumena zaindu, ez utzi zaborrik eta errespetatu mendian dabiltzan beste erabiltzaileak», zehaztu dute antolatzaileek. Era berean, debekatuta egongo da «jarrera oldarkorra, arriskutsua edo iraingarria izatea» beste parte hartzaileekin edo antolatzaileekin.