Alegiako zenbait bidegurutze itxita egongo dira hainbat egunez Larraitz auzoaren ekialdea berritzeko lanak amaitzeko. Udalak adierazi duenez «amaitzetik gertu» dago obra, eta «azken erremateak» emateko itxita egongo dira Kikara gozotegitik auzoaren ekialdera sartzeko bidea eta Errotatxo okindegi ondotik Larraitz 4 eraikin aldera sartzeko bidegurutzea.
Kikara gozotegiko sarbidea astebete inguruz egongo da itxita; eta, ordezko bide modura, ikastetxearen eta Larraitz 1 eraikinaren arteko pasabidea erabili beharko dute herritarrek, sartzeko zein ateratzeko.
Errotatxo okindegi ondotik Larraitz 4 eraikin alderako sarbidea, berriz, urriaren 27an —datorren astelehenean— itxi eta bizpahiru egunez egongo da itxita. Lanek iraun bitartean Larraitz 4 azpiko garajeetarako sarbidea «ezohiko neurri modura» Larraitz 14 eraikinaren ondotik egin beharko da, berezko noranzkoaren kontrako zentzuan. Udalak aurreratu du litekeena dela «lanak egin ahala» ohiko lekutik sarbideren bat ahalbidetzea.
Lanak amaitzen dituztenean ohiko sarbideak eta norabideak berrezarriko dituzte.