Alegia Zainduz proiektuak beste herri batzuetako zaintzaren inguruko esperientziak ezagutzeko hitzordua antolatu du. Bihar —urriaren 22an— egingo dute hitzaldi irekia kultur etxeko areto nagusian, eta 17:00etan hasiko da. Mahai-inguruan Legorretako, Oiartzungo, Errezilgo eta Bidania-Goiazko esperientziak kontatuko dituzte eta, horrela, aukera egongo da bizipenak zuzenean ezagutzeko.
Ekimena herritar guztiei irekita prestatu dutela zehaztu dute, eta Regina Sorarrain alkateak nabarmendu du «aukera oso aberasgarria» izango dela inguruko esperientzietatik irakaspenak atera eta euren bidearen inguruan hausnartzeko.