Alegiako Udalaren eta Adifen arteko elkarlanari esker, tren geltokiko irisgarritasuna hobetzeko helburuz, lur azpiko pasabidea egingo dute. Proiektua erredakzio fasean dago, eta gauzatzen dutenean, geltokiko irisgarritasuna eta segurtasuna «modu nabarmenean» hobetuko direla azaldu dute udaletik.
Lur azpiko pasabide berriak erabiltzaileei trenbidea modu seguruan gurutzatzea ahalbidetuko die, trenbideetatik igaro beharrik gabe. Beraz, trenbideen arteko egungo pasabidea desagertu egingo da. Geltokiak trenbide azpitik igaroko den lur azpiko pasabide bat izango du, igogailuak izango dituena. Bereziki, mugikortasun murriztua duten pertsonei, adinekoei, haur txikien orgatxoak dituzten familiei edo maletekin doazen bidaiariei egingo die mesede.
Esku hartze hau Adif Gipuzkoako geltoki ezberdinetan egiten ari den edo egingo dituen hobekuntzen barruan sartzen da. Alegiaz gain, Tolosa Erdia, Anoeta, Ormaiztegi, Pasaia eta Legorretan egingo dituzte hobekuntzak.
Alegiako Udalak eskerrak eman dizkio Adifi herriko azpiegiturak hobetzeko hartutako konpromisoagatik eta tren mugikortasun inklusiboago eta seguruago baten alde egindako sustapenagatik.