Datorren asteazkenean —hilaren 11n— jendaurrean aurkeztuko dute Alegiako Osasun Zentroa eraberritzeko proiektua. Udaletik aurreratu dute «datozen hilabeteetan eraberritze sakona» izango duela eta, hain zuzen, proiektuak osasun zentroa eta jubilatuen elkartearen egoitza berritzea biltzen ditu, eta baita hiri-igogailu ezartzea ere, osasun zentrora irisgarritasuna bermatzeko.
Jendaurreko aurkezpen hori herritar ororentzat irekia izango da eta bertan udal ordezkariek eta egitasmoaren arduradun teknikoek hartuko dute hitza. Alegiako Udalak bertaratzeko gonbidapena egin die herritar guztiei: «Hurbiltzeko deia egiten dugu, etorkizunean izango ditugun osasun instalazio berrien inguruko xehetasun guztiak ezagutu ahal izateko».