Alegiako Udalak datozen asteetarako egitarauaren berri eman du: Udaberriko Kultur Egitaraua. Maiatzetik uda hasi bitarte, hamalau jarduera ezberdin izango dituzte. Denetariko eskaintza bildu dute aste horietako programazioan, besteak beste, tailerrak, literatur solasaldiak, jaialdiak, askotariko emanaldiak eta irteerak.
Lehena maiatzaren 5ean izango dute: Sukaldaritza begetarianoa eta beganoa modu iraunkorrean ikastaroa; eta, aurrerantzean, astelehenetan eta asteazkenetan egingo dute, 17:00etatik 20:00etara, eskolan. Azken hitzorduak, berriz, San Juan ospakizunen bueltan izango dituzte.
Udalak adierazi du herritar guztiei zuzenduta prestatu dutela:«Jarduera ezberdinez osaturiko menua prestatu da». Egitaraua elkarlanean antolatu dute herriko beste zenbait eragilerekin batera.