Pasa den asteburuan Duatloiko Espainiako Txapelketa jokatu zuten Caceresen (Extremadura, Espainia) eta hirugarren izan da Paula Del Pozo alegiarra. Esprint distantziako proba izan zen eta hurrenez hurren egin zituzten bost kilometro korrika; hogei, bizikletaz; eta beste bi kilometro eta erdi, korrika.
Emaitza bikaina lortu zuen Del Pozok, une oro aritu baitzen lehen postuen arteko norgehiagokan. Hori horrela, absolutu mailan brontzezko domina irabazi zuen, eta 23 urtez azpikoen kategorian, berriz, Espainiako Duatloi Txapeldun izatea lortu zuen.
Hori gutxi ez, eta emaitza horri esker, Pontevedran (Galizia) jokatuko duten Munduko Duatloi Txapelketan parte hartzeko txartela eskuratu du alegiarrak.