Gipuzkoako Bertsozale Elkarteak bertso eskolekin elkarlanean Gelatik Plazara ekimena antolatu du eta goizean jokatu dute Lehen Hezkuntzako finala Alegian. Zinean eta kultur etxean egin dituzte azken saioak.
14 urtez azpiko ikasleei jendaurrean trebatzeko aukera eskaintzeko aisialdiko ekimena da Gelatik Plazara. Bertsoarekin gozatzeko gune bat izan dute bertso eskoletako gaztetxoek eta Eskolarteko txapelketara iritsi aurretik plazarako zubi lana egiten laguntzea da asmoa. Horrekin batera, tokian tokiko bertso eskolak saio berean elkartuta ikasleek elkar ezagutzeko aukera izan dute.
Bi maila ezberdinetan parte hartu dute gaztetxoek: LH mailan eta DBH mailan. 2-4 lagunez osaturiko taldeetan batuta, tokian tokiko bertso eskolak saio berean elkartu eta elkar ezagutzeko aukera paregabea dute saioetan. 250 bertsolari gaztek hartu dute parte antolatu diren hitzorduetan.
Esan bezala, gaur egin dute Lehen Hezkuntzako finala Alegian, eta datorren ostiralean, apirilak 4ean, berriz, DBH mailakoen finala ospatuko dute Azpeitian.