Joan den ostiralean, martxoaren 7an, Alegiako Herri Eskolako LH 5. mailako hamasei ikaslek BSTK Basotik Fundazioaren "Desioen Basoa" jardueran parte hartu zuten. Ekimena Gipuzkoako eskualdeetako ikastetxeetan otsailetik martxora egiten ari diren tailer sorta baten parte da, basoen balioa nabarmentzeko eta haiek zaintzearen garrantzia azpimarratzeko helburuarekin.
Bada, Alegiako ikasleek, ordubeteko saioan, ikus-entzunezkoak aztertu, lantaldeetan jardun eta fitxak osatu zituzten. Lehenik, basoen testuingurua aurkeztu eta aberastasuna zein erabilera ezberdinak azaltzen dituzte; ondoren, espezieak identifikatu eta basoen kudeaketaren «garrantziaz» hitz egin zuten; eta azkenik, zuhaitz txiki bat landatu zuten, Gipuzkoako basoekin duten «harremana indartuz». Antolatzaileen hitzetan, tailerrak nabarmendu egiten ditu «basoen onurak, haien erabilera historikoa eta kudeaketa jasangarriaren garrantzia», eta ikasleei ekarpena egiteko aukera eskaintzen die.