Uztaileko jaiak antolatzeko bilera irekia egingo du Alegiako Festa batzordeak datorren astelehenean, hilaren 17an, 17:30ean, Inaxio Begiristain kultur etxean. Herritarrei zein herriko eragileei gonbidapena luzatu diete antolatzaileek: «Asteleheneko bilera hori irekia izango da ekarpenen bat edo proposamenen bat egin nahi duen ororentzat. Guztiak ongi etorriak izango dira ahalik eta egitaraurik anitzena osatzeko bidean».
Hari horri tiraka gehitu dute norbaitek bilerara joan ezingo balu, ekarpenak zein proposamenak egiteko aukera izango lukeela beste bide batzuk erabilita: batetik, kultura@alegia.eus helbide elektronikora idatzita; bestetik, udalaren webguneko iradokizunen atala erabiliz; eta, azkenik, udalaren mugikorretarako aplikazioaren bitartez.