Alegiako bi odol emaile saritu dituzte, eta hori ospatuz Txintxarri jatetxean elkartu dira herriko hainbat odol emaile. Juan Inazio Rekondok 100 dohaintza egin dituela-eta oroigarria jaso du Odol Emaileen Elkartearen eskutik, eta Iker Tolosak, bestalde, 25 dohaintza egiteagatik, diploma jaso du.
Urtean zehar odol emateak herriko kultur etxean egiten badituzte ere, gaurko goiza elkarrekin egoteko Txintxarri jatetxea aukeratu dute, ardo bat eskuan, egiten duten lana ospatuz. Gaurkoan, bi odol emaile zoriontzea egokitu den honetan, atzera begira jartzeko aukera ere baliatu dute: «Lehen askoz gehiago elkartzen ginen, Goierrikoekin batera, baina pandemiak dena bertan behera utzi zuen».
Edonola ere, gizarteari egindako ekarpenarekin jarraitzeko bidea da gaurko aitortza.