Asteburuan hainbat kalte eragin dituzte Alegiako pilotalekuan eta futbol zelaian. Elorri pilotalekuko kantxan su-itzalgailuak hustu dituzte eta bertako komun publikoak zikindu. Futbol zelaian, berriz, ezarri berri diren harmailak zikindu dituzte.
Alegiako Udalak «modu irmoan» gaitzetsi eta salatu ditu ekintza horiek: «Oraindik %100ean zabaldu gabe dauden instalakuntzak dira eta diru publiko asko bideratu da instalakuntza horien eraberritzera. Guztiok erabiltzeko instalakuntzak diren neurri berean dagokigu gune horien zaintza ere». Zentzu horretan, udalak horrelako jokaerak eta ekintzak ez errepikatzea espero du; bestela, «gustukoak izango ez diren neurri zorrotzak» hartuko dituela iragarri du.