Kultur eta kirol etxeko aldagelak berritzeko lanak «amaitzetik gertu» daudela iragarri du Alegiako Udalak. Joan den astetik kirol taldeek erabilgarri daukate Elorri pilotalekua eta, atzotik aurrera, gimnasioa ere zabalik izango da.
Lanak, ordea, ez daude erabat bukatuta eta, behin-behinean, honako ordutegia izango du gimnasioak: astelehenetik ostiralera, 8:30etik 20:30era. Bukatzen dutenean, berriz, lehengo ordutegia berreskuratuko du.
Bestalde, aldagelak eta komunak ezingo dira erabili oraindik. Udalak azaldu du instalakuntza horiek osatzeko falta den materiala Valentziatik datorrela eta «bistakoak diren arrazoiak medio» ezin dutela jakin noiz jaso ahal izango den material hori. Zentzu horretan, erabiltzaileei ulermena eskatu diete, ezjakintasun egoera horretan zaila delako lanen behin betiko amaiera data zehaztea.
Urtea bukatu arte, doan
Gimnasioa zabaltzen denetik urtea amaitu bitarteko epea ez diete kobratuko erabiltzaileei. Lanek sortu dituzten eragozpenak direla eta, erabiltzaileekin keinu hori eduki du udalak.