Madagaskarrera bidaltzeko betaurrekoak biltzen ari dira Alegian. Baobab taldeak sustatuta Egin zaitez ikusgai kanpaina ari dira gauzatzen hainbat herritan, tartean, Alegian. Egitasmoaren xedea da jendeak etxean izan ditzakeen eta erabiltzen ez dituen betaurrekoak biltzea, ondoren, Madagaskarrera bidaltzeko.
Alegiako Udaletik azaldu dute «edozein motatakoak» izan daitezkeela betaurrekoak eta hainbat lekutan utz ditzaketela herritarrek: Alegiako Herri Eskolan, Aralar Institutuan eta herriko kultur etxean. Azaroaren 30era arte arituko dira betaurrekoak biltzen eta udaletik herritarrak «animatu» dituzte kanpainan parte hartzera.