Alegian hasi du ikasturtea Txintxarriak Martxan ekimenak ere. Joan den astean egin zuten lehen ibilaldia eta, hemendik aurrera, ostegunetan egingo dituzte irteerak. Egitasmoak helburu du adinekoak animatzea ariketa fisikoa egitera eta elkarren arteko harremanak sustatzera; eta elkarlanean antolatzen dute herriko udalak, osasun-zentroak eta beste hainbat eragilek.
Aurreko asteko saioan 50 adineko bildu zituzten, horietatik, hemezortzik egin zuten ibilaldi luzea eta, 32k, ibilaldi laburra. Behin jarduna amaituta, hamaiketakoa egin zuten.
Antolatzaileek azaldu dute zabalik dagoena izena emateko epea: «Oraindik izenik eman ez duen norbait baldin badago eta irteeretan parta hartu nahi badu, edozein ostegunetan 10:30ean plazara agertu daiteke eta izena eman. 11:00etan abiatzen dira Txintxarriak Martxanen irteerak eta behin izena emanda, parte hartu ahal izango da».
Hari berari tiraka, Alegiako Udalak eskerrak eman nahi dizkie ekimena antolatzen eta irteeretan laguntzen ari diren eragile eta boluntario guztiei eta adinekoak Txintxarriak Martxanekin bat egitera animatu ditu.