Dianaren ondoren Txintxarriak Martxan taldeko kideek emanaldi «berezia» egin behar zuten Alegiako plazan, baina atzeratu egin dute eguraldia zela-eta. Hamaiketakoa udaletxeko arkupean egin dute, urtero bezala, eta 80 bat lagun bildu dituzte.
Ondoren, 12:00ak aldean, ikasturtean zehar prestatutako lauzpabost dantza eskaini dituzte Txintxarriak Martxan taldeko kideek eta, jarraian, dantzaldia izan dute Iñigo Etxenike DJarekin. Eguerdian haurren eta bazkaria egin dute, eta beste 80 haur eta nerabe inguru bildu dituzte.
Arratsaldera begira, haurrentzako parkea eta apar festa izango dituzte. Eta 19:00etan, berriz, bigarren dantzaldi bat ere izango da Jose Mari Orbegozo eta Txomin Carron DJaren eskutik. Hortik ordubetera, 20:00etan, herri osoarentzako bingoa egingo dute eta, 21:00etan, zahagiardoa. Eguna bukatzeko, berriz, Puro Relajo taldeak emango du kontzertua herriko plazako oholtzan.