Bihar banatuko dute 2024. urterako egutegia Alegiako etxe guztietara. Alegiako Udalak babestuta, doan banatuko dute argazki zaharrekin eta horien inguruko bertsoekin osatutako egutegia. Alegiako argazkizaleen taldea arduratu da irudiak aukeratzeaz –batzuk aspaldikoak eta besteak ez hainbeste– eta gero horien araberako bertso bana jarri diete Harituz taldeko bertsolari alegiarrek.
Herritik kanpo bizi diren hainbat herritarri ere bidali diete; eta, guztira, ia mila ale banatu dituzte aurten ere. Soberan geratzen diren egutegiak udaletxean gordeko dituzte, eta bertan eskuratu ahal izango dira. Bestalde, aurreko urteetako egutegiak eta argazkiak ikusgai daude Txintxarri plazako Kultur Kabinan.
2002an kaleratu zen mota honetako lehena, eta aurtengoa 23. egutegia izango da.