Udako geldialdiaren ostean, ostegunean itzuliko da Txintxarriak Martxan ekimena. Ikasturte honetan ere bi talde antolatu dituzte: ibilbide luzeak egiteko, momentuz, hemezortzi kide bildu dituzte; ibilbide laburrak egiteko, aldiz, 26 batu dira.
Ostegunero 11:00etan herriko plazatik abiatuko dira, eta egitasmoaren helburuak dira adinekoak ariketa fisikoa egitera bultzatzea eta haien arteko harremanak sustatzea. Aurten berrikuntza bat ere izango dute, hain zuzen, ibilaldiak amaitu ostean hamaiketakoa egingo dute. Joan den urtean hilean behin egiten zuten hori; bada, aurten, ostegunero izango da.
Zabaltzeko gogoa
Parte hartzea hedatzeko asmoz, antolakuntzak gutunak bidali dizkie herriko adineko pertsonei. Azaldu dutenez, pandemiaren eraginez jaitsi egin omen zen parte hartzaileen kopurua, eta aurretik bildutako kopuruetara hurbiltzea omen da asmoa. Momentuz 44 pertsonak eman dute izena, baina parte hartu nahi duen edonork plazan bertan eman ahalko du izena, ostegunetan, 10:30etik aurrera.
Alegiako Udalak eta osasun etxeak antolatzen dute Txintxarriak Martxan, eta hainbat laguntzaile dituzte inguruan: alde batetik, ibilaldietan gurpildun aulkietako pertsonei eta bestelako lanetan laguntzen dute Nagusilanek, elizak, jubilatuen elkarteak eta aurten laguntzen arituko dira Aralar institutuko ikasleak ere. Horiekin batera, ibilaldien osteko hamaiketakoa prestatuz laguntzera animatu dira Jubilatuak, Iskiña, Hilario Berri, Eizmendi eta Txintxarri tabernak.