Inoiz baino postu gehiago izango ditu aurtengo Alegiako azokak. Igandean izango da, 11:00etatik 14:00etara, eta 30 postu inguru jarriko dituzte, barazki, pintxo, postre, kosmetika, artisau, poltsa... denetariko postuekin.
Andrea Larrañaga zinegotziak esan duenez, «festa giroan» ospatu nahi dute goiza. Orain arte plazan eta taxi geltoki inguruan egiten zuten azoka, baina aurten postu gehiago izango direnez, Kalebehera aldera luzatuko dute. Beraz, autoentzako pasabidea moztuko dute. Tontokale gaineko bidegurutzetik Orendaingo bidegurutzerainoko tartea itxita egongo da ibilgailuentzat 11:00etatik 14:00etara. Tarte horretan saihesbidea erabili beharko da Orendainera edo Larraitz auzora joateko.