Gazte Eguna ospatzen ari dira gaur Alegiako gaztetxean. Eguna lanean hasi dute: auzolanerako deia egina zuten, eta besteak beste, gaztetxe atariko jardina txukuntzen aritu dira. «Aste honetan moztu dituzte jardinean dauden zuhaitzetako adarrak, eta gaur adar horiek bazter batean txukun uztea tokatzen zaigu», esan dute parte hartu dutenek. «Gainerakoan, goiko solairua txukundu eta orokorrean errepaso bat emateko beharra duten gauzekin arituko gara», gehitu dute.
Egunari jarraipena emateko, bazkaria izango dute. Aurreratu dutenez, 60 lagun inguru bilduko dira mahaiaren bueltan. Bazkalostean bingoa eta poteo musikatua izango dituzte, eta 23:00etan, Manitu eta DJ Padu arituko dira giroa jartzen.