Alegia aukeratu dute Ilargiak eta landareak 2023ko agenda aurkezteko. Urriaren 13an, ostegunean, kultur etxean izango da Argiak kaleratzen duen agendaren aurkezpena, 18:00etan, eta herritar guztiak gonbidatu dituzte bertara. Bizi Baratzea egitasmoaren barruan, Argiak urtero argitaratzen du agenda.
Hasteko, agendaren egile diren Jakoba Errekondo paisajista eta landareen dibulgazioan erreferente denak eta Antton Olariaga ilustratzaileak hitzaldi bat eskainiko dute. Tartean, Iñaki Sanz Azkue biologoak ere parte hartuko du, eta hitzaldiaren ostean, Unai eta Eñaut Agirre bertsolariek piztiei buruzko bertso zaharrak abestuko dituzte. Aurkezpen hitzaldi berezia izango da. Hitzezko azalpenez gain, marrazkiak eta bertsoak uztartuko dituzte. Era berean, bertaratzen direnek galderak egiteko aukera izango dute, eta horrela landare-zaleen arteko elkarrizketari bide emango diote esperientziak eta jakintzak partekatuz.
Agendan ilargiaren araberako urte guztiko lanak bildu dituzte. Astez aste eta hilabetez hilabete egin beharreko lanak zehazten dira; baratzean, fruitu arboletan, lorategian edota basoan. Noiz eta zer erein, zer landatu, nola inausi, nola tratatu, zer uzta jaso, nola txertatu… Aparte, agendak urtero gai berezi bat hartu ohi du ardatz gisa, eta 2023koak bioniztasuna izango du; landareen inguruan bizi diren intsektu, anfibio, ugaztun, hegazti,...
Lanen liburu-agenda honek sei urteko ibilbidea du. Bertan landareekin lotutako Jakoba Errekondok urteetan bildutako jakintza osoa irakurri ahalko da.
Horrez gain, Alegia aukeratzearen arrazoia herri baratzeen proiektuari aitortza egin nahi diotela izan da: «Baratze publikoak eta komunitarioak sustatzeak, elikadura burujabetza indartzen du eta baita bioniztasuna ere».