Intxurre elkarteak antolatu duen Herri Bazkarirako txartelak erosi ahal izateko azken eguna urriaren 12a, asteazkena izango da. Herri Bazkaria plazan egingo dute larunbatean, hilaren 15ean, eta oraindik bertarako joateko aukera dute herritarrek.
25 euro ordaindu beharko dute txartela helduek, eta 10 euro haurrek. Salgai daude kultur etxean, Errotatxon eta Xune estetikan.
Bestalde, eguna alaitzeko Mugi Panderoa erromeria taldea izango da egun guztian zehar, Alegian. Goizean kalean zehar eta herriko tabernetan ibiliko dira, eta herria eta jendea alaitzen. Bazkaldu ondoren, kantuan eta dantzan jarriko dituzte bazkaltiarrak. Eibar eta Elgoibarko zazpi partaidez osatutako taldea da Mugi Panderoa, eta «herria sutan jartzeko asmotan omen datoz», eman dute jakitera elkartetik.