Eskualdeak kirola egiteko azpiegitura berria du, Egurre rokodromoa. Alegiako Bazurka industrialdean zabaldu berri dute, eta eskalada maite dutenek, izan hasiberriak edota esperientziadunak, kirol hori egiteko beharrezko guztia topatuko dute bertan, gisa honetako gune gutxitan aurki daitezkeen ezaugarriak jarri baitituzte eskura. 1.100 metro karratu dituen pabiloian kokatu dute kirol eskalada eta boulder gunea, orotara, 1.200 metro. Bi solairutan banatuta dago, behean eskalada gunea dago eta goiko solairuan boulder gunea. Eskaladako paretei dagokienez, 9-10 metro inguruko altuera dute, 60 katerekin, eta bakoitzak hiru eskalada lerro ezberdinerako gaitasuna du. Boulder eremua berriz, 4,5 metroko altuera duten hormek osatzen dute, eta 45 metro inguru hartzen ditu. Beheko solairuan dagoen kirol eskalada gunean bada nabarmentzeko ezaugarri bat. Izan ere, Tokioko 2020ko Olinpiar Jokoetan eskaladan lehiatzeko erabili zen paretaren erreplika dago. Txapelketetarako prestatzeko balio erantsi bat izateaz gain, urte guztian zehar boulder eremu gehigarria da.
Entrenamenduei begira, bestalde, gune berezi bat egokitu dute. Beroketa, muskulazioa, campus board, spray wall eta hatz entrenamendu espezifikoa garatzeko beharrezko guztiak topatu ahal dira bertan. Eta, adina oztopo izan ez dadin etxeko txikienei begirako gune bat ere prestatu dute Egurre rokodromoan. 16 metro karratu dituen eremua da, eta gaztetxoak kirol honetan hasteko aukera ematen du, ondo pasatuz, gurasoen begiradapean.
Eskaladan trebatzeko maila ezberdineko ikastaroak ere izango dira eskura, irailetik aurrera, hastapenekoak, erdi mailakoak eta teknifikazio taldeak. Eta, rokodromoaz gozatzeko bakoitzaren beharretara egokitutako tarifak dituzte, bazkide egiteko aukerarekin. Aldagelak ere badituzte, eta eskalatzera joan edo ez, taberna zerbitzua badute.
Eskaladaren munduan eskarmentua duen lantaldea dago rokodromoaren atzean, eskalatzera doanari harrera egiteko, laguntzeko edota zalantzak argitzeko irrikaz.
- Helbidea. Bazurka industrialdea 12-13 (Alegia)
- Telefono zenbakia. 650 66 45 90
- Sare sozialak.
Instagram: @egurreholds
Facebook: Egurreholds - Posta elektronikoa. egurreholds@gmail.com
- Ezaugarriak. 1.200 metroko eskalada eta boulder gunea; eskaladarako, 9-10 metroko altuera, 60 kate hiru eskalada lerrorekin; boulderra egiteko 4,5 metroko altuerako 45 metro; haurrentzako gunea; entrenamendu gunea, ikastaroak.