Alegian gaztetxoen ekintzailetza eta parte hartzea bultzatu dute

Alegian gaztetxoen ekintzailetza eta parte hartzea bultzatzeko ekimena martxan jartzea erabaki zuen, iaz, Alegiako Mendi Asanbladak udalaren babesarekin. Horretarako Asteasuko Mattin Gizarte Abenturarekin elkarlanean hasi zuten bidea, eta ikasturtean zehar eginiko lana «arrakastatsutzat» dute.

Urrian eman zieten hasiera, horretarako diru laguntzak bideratu eta gero. Horrela, lan deialdi baten bidez ikasturte osorako Mattin Gizarte Abenturako hezitzaile bat kontratatu zuten.

Orain, balantzea egiteko garaia iritsi zaiela aitortu dute: «COVID-19aren egoerak eta neurriek baldintzatuta hasi bazen ere gure proiektua, poliki-poliki bere bidea egiten joan da». Eta Aste Santurako lehen ekimena antolatu zuten gazteek: Herritarrentzat Mendi Ginkana. «Ekimena eta emaitza arrakastatsua izan zela esateko moduan gaude, ia 50 pertsonek parte hartu baitzuten».

HILEROKO BATZARRAK

Hilero antolatzen joan dira gaztetxoak eta batzarrak egin dituzte; «gaztetxoen beharrak eta nahiak bildu eta aztertu ondoren, berauek udalera bideratzeko balio izan du gure proiektuak», zehaztu dute mendi asanbladatik. Orain, «eskaerei erantzuna emanez, udalak Gazte Udalekuak antolatu ditu uda honetarako», kontatu dute.

Mendi asanbladako kideek, eskerrak eman nahi dizkiete bai Mattin Gizarte Abenturari eta baita Alegiako Udalari ere, «emandako laguntza eta egindako lanarengatik». Eta mezu garbia utzi dute: «Elkarlanean herria eraikitzen jarrai dezagun».