Extremadurara egindako bidaiatik "asebeteta eta pozik" itzuli direla esan dute Alegiako Txintxarri abesbatzako kideek.
Caceresko Hervas herrian eskaini zuten kontzertua joan den apirilaren 22an, eta bertaratu zirenek "pozik" entzun zituztela alegiarren doinuak adierazi dute. Bukaeran, entzuleak zutik jarri zitzaizkiela kontatu dute, eta txalo zaparrada batekin erantzun zieten Alegiako abeslariei. Azken kantua Hervasko abesbatzarekin batera eskaintzeko aukera izan zuten.
Garbiñe Orbegozok zuzenduta eta Mariaje Rekondok pianoarekin lagunduta egin zuten 62. urteurreneko ospakizun emanaldia.
Gainerako egunetan, Caceresko eta Salamancako hainbat herri bisitatzeko aukera ere aprobetxatu zuten.