'Zuk ez duzu ordezkorik' saioa, trafiko istripuak prebenitzeko

Alegiako Aralar institutura iritsiko da Eusko Jaurlaritzako Segurtasun Sailaren Don’t be Dummy | Zuk ez duzu ordezkorik  kanpaina, ostegunean. Ibiltariek trafiko istripuak prebenitzeko helburua daukate, eta Euskadiko ikastetxe ez unibertsitarioetako gazteei zuzenduta daude. Jaurlaritzako kanpaina honetan, 15 eta 20 urte bitarteko gazteek hartzen dute parte.

 

Zuk ez duzu ordezkorik bide hezkuntza programa bertako gazteen aurrean aurkeztuko dute. Alegian, 10:37an DBH4ko ikasleei streaming bidezko saio bat eskainiko diete. Online edo streaming bidezko saioa izango den arren, ekitaldian zehar testigantza ezberdinak ikusteko eta entzuteko aukera izango dute: ertzaina, suhiltzailea, larrialdietan lan egiten duen medikua, trafiko istripuek utzitako biktimak… Lehenengo pertsonan kontatutako testigantza horien bitartez gazteen barnea mugitzea lortzen dute, eta "bizipen horiek oso hunkigarriak izaten dira eta gazteengan inpaktu handia edukitzen dute".

 

Orain arte, Araba, Bizkaia eta Gipuzkoako 58 udalerritan egon da programa, eta dagoeneko 144 saio burutu dituzte, eta horietan 161 ikastetxek hartu dute parte.