Aurrera Alegia taldeak sinadura bilketa abiatu du herrian, Alegiako alkateari galdeketa bat bultzatzea eskatzeko. Galdeketa horretan herritarrek ondorengo galderari erantzuna ematea nahi dute: "Zer hondakin sistema nahi duzu Alegiarako, atez atekoa edo bost edukiontzirekin?"
Aurrera Alegia taldeak esan duenez, "galdeketaren helburua ez da gaur egungo sistema aldatzea, baizik eta herritarrei gai honi buruz erabakitzeko aukera ematea". Horretarako, hondakin bilketaren inguruko informazioa banatu die herritarrei: "Datu objektiboak jarri ditugu eskuragarri, eta orain bakoitzak bere hausnarketa egin beharko du".
Aurrera Alegia taldeak zabaldu duen informazioan dio 2016 urteaz geroztik birziklatze tasa %9,56 jaitsi dela Alegian. "Urte beretik gaur egunera arte, etxebizitza bakoitzak %92 gehiago ordaintzen duen arren, sistema honek %30eko defizita du Alegian, eta 2021ean udalak 72.402 euro jarri beharra izan zituen zuloa estaltzeko", gehitu dute.
Alegiako datuak beste bi herrietakoekin ere alderatzen ditu Aurrera Alegia taldeak, Legorretakoekin eta Idiazabalgoekin, hain justu. Bi herri horiek bost edukiontzi dituztela, eta "Alegian baino birziklatze tasa hobea eta kostu txikiagoa dutela" azaldu dute. "Bi herri horietan zabor sistemak sortzen duen defizita Alegiakoaren herena da".