Alegiako Herri Eskolako LH 5. mailako ikasleek Amezketa errekako zati bat garbitu zuten ostiralean. Alegiako Udalak sakabanatutako zaborren pilaketa fokuak prebenitzeko eta zuzentzeko aurten martxan jarritako Alegiako natur guneen garbiketa proiektuaren barruan, Franconitik hasi eta futbol zelaira bitarteko ibai zatian aritu ziren garbiketa lanetan, Urzain taldeko kideek dinamizaturiko saioan.
Guztira 45 kilo hondakin atera zituzten ibaitik. Udalak esan duenez, "plastikozko hondakinak izan ziren gehienbat atera zituztenak, baina freskagarri latak, burdina eta maskarak ere atera zituzten". Sentsibilizazio jarduera horretan parte hartu zuten gaztetxoak taldetan banatuta aritu ziren ibaiko zati ezberdinak garbitzen eta amaieran, "harridura erakutsi zuten hain denbora tarte laburrean atera zuten hondakin kopurua ikusita".