COVID-19a dela eta, urte eta erdiko etena egin behar izan dute Txintxarri eta Txitxarri Txiki abesbatzek. Bihar, ordea, entseguei ekingo diete berriro bi abesbatzek, neurriak malgutu direla kontuan hartuta.
Ez dela urte erraza izan bi abesbatzentzat adierazi dute, orain dela gutxi arte ez baitute jakin noiz iritsiko zen kantura itzultzeko eguna. Orain, Garbiñe Orbegozo herritarraren zuzendaritzapean, segurtasun neurriak hartuta hasiko dira. Taldeko txikienek 19:30etik 20:30era izango dute entsegua. Helduenek, berriz, 21:00etatik 22:30ak arte ariko dira kantuan.
Abeslariek segurtasun protokoloa bete beharko dute; eskuak ondo garbitu, tenperatura hartu, musukoa erabili eta entsegu bakoitzean erabilitako materiala desinfektatu beharko dituzte.
Abesbatzatik aipatu dute aurrerago jakinaraziko dituztela zein emanaldi eskainiko dituzten.