Alegiako Udaleko Kultura batzordea pandemiaren eraginez geldirik egon bada ere, astelehenetik aurrera martxan jarriko da. Ohiko moduan, batzordeko ateak herritar guztientzat irekita daudela gogorarazi dute udaletik, herriko kultur eskaintza aberastea dute helburuen artean. Horretarako, herritar guztiei zabaldu dizkiete ateak, eta ideia, proposamen edo ekarpenen bat duen guztiei dei egin die, astelehenean, hilaren 13an, 18:00etan kultur etxean egingo den bilerara joateko.
2022a kulturalki urte berezia izango dela Alegian aurreratu dute. Inaxio Begiristainen jaiotzaren mendeurrena izango da, eta Intxurre elkartea sortu zela ere 50 urte beteko dira. Hori kontuan izanda, udalak herriko eragileekin lehen bilerak egin dituela eman dute jakitera. Data seinalatu horiek kontuan izanda programazio kultural "zabal eta berezi bat" antolatu nahi dute.