Etxerako bidea elkarrekin egiten jarraitzeko

Josu Artutxa Dorronsoro 2021ko uzt. 17a, 14:08

Tolosaldeko Sarek, Alegian amaitu du duela bi aste abiatutako Ibilian Ibilian Etxerako Bidean dinamika ibiltaria, beste eskualde batzuei erreleboa eman aurretik; 200 lagun inguru bertaratu dira eskualdeko herri ezberdinetatik.

Izan Bidea dinamikaren barruan, milaka euskal herritarrek pasa den hilabetean Euskal Herriko tontorrik ezagunenak igo zituzten Sarek deituta. Preso eta iheslarien etxeratzearen alde, eta elkarbizitzaren eta bakearen alde egin zuten ekimena, hain zuzen ere. Duela gutxi, "pozez" hartu zuten Andaluziako espetxeetatik egin diren azken lekualdatzeen berria.

Hori dela eta, Izan Bidea dinamikari bultzada bat emateko asmoz, Ibilian Ibilian Etxerako Bidean dinamika ibiltaria jarri zuten martxan duela bi aste. Debabarrena eta Debagoienan hasitako ibilbideari, Buruntza eta Goierrik eman zioten jarraipena; azken egunetan, berriz, Tolosaldeak.

Horrela, eskualdea batu duen Ibilian Ibilian Tolosaldea urdinduz ekimena gauzatu dute gaur. Goizean herri ezberdinetatik oinez edo bizikletan abiatu diren 200 lagun inguru bildu dira, eguerdian, Alegian. Bertan, herritarrak eskertu eta zoriondu ditu Tolosaldeko Sarek: "Mila esker, Tolosaldea urdintzeko erronka posible egin duzuen guztioi, salbuespen espetxe politika amaitzearen aldeko aldarriaren bozgorailu zareten guztioi".

Azken hilabeteetan emandako aurrerapausoak eta gerturatzeak, "denok egiten dugun lanari esker" gertatzen ari direla nabarmendu dute. "Baina oraindik asko dugu egiteko. Une honetan, euskal presoen herena soilik dago Euskal Herriko kartzeletan, 60 besterik ez. Gainerako 147 presoek, Espainiako zein Frantziako espetxeetan jarraitzen dute, guztiek gurekin behar luketen arren. Lege arrunta aplikatuta ere, ez lukete arazorik behar gradu progresioan aurrera egiteko, baina oraingoz, euskal preso gutxik lortu dute hirugarren gradua aplikatzea".

Ondorioz, ibilian ibilian, etxerako bidea egiten jarraitzeko deia luzatu dute. Hain justu, Iñaki Artola alegiarrak eman die erreleboa datozen egunetan ekimenak antolatuko dituzten Urola Kosta, Oarsoaldea eta Bidasoa eskualdeei. Bestetik, uztailaren 22, 23 eta 24rako Euskal Herria zeharkatuko duen bizikleta martxan nahiz abuztuaren 21ean Gipuzkoako Dinamika ibiltariari amaiera eman eta eskualde guztiak batuko dituen Donostiako mobilizazioan parte hartzeko gonbita luzatu die Sarek eskualdeko herritarrei.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!