Artolak Buruz Buruko Txapelketa jokatzeko txartela eskuratu du, Zallako Mimetiz pilotalekuan Axier Arteagari partida irabazita, 22-2ko emaitzarekin. Atzo jokatu zen aurrekanporaketako partida, beraz, dagoeneko erabaki dira Baiko enpresatik nortzuk arituko diren txapelketan. Alegiarrarekin batera, Erik Jaka eta Jon Ander Peña daude Baikotik. Horiez gain, Urrutikoetxea, Agirre eta Bengoetxea VI.a dira zerrendan daudenak.
Alegiarrak erraz hartu zuen mendean Axier Arteaga lasartearra. Sei tanto egin zizkion sakez, eta beste bederatzi tanto atzean. Arteaga II.ak ez zuen ezer egiteko aukerarik izan Artolaren aurrean.
Atzoko partida berrikuntza batekin jokatu zen: lehen aldiz botilleroak izan zituzten aholkulari pilotariek. Eta berrikuntza horrek Buruz Buruko Txapelketa osoan zehar iraungo du. Atzoko kasuan, Artolak bere anaia Mikel izan zuen laguntzaile.