Artolak ezin izan du bere maila erakutsi

Argazkia: EITB

Ezkurdiaren aurka 22-8 galdu zuen atzo alegiarrak Lau eta Erdiko Txapelketaren final-laurdenetan, Eibarren jokatutako partidan.

Partidaren hasiera parekatua izan bazen ere, markagailuan seina jarriz, Ezkurdia zuzenean joan zen gero 21 tantoetara. Azken unean bi tanto egin zituen Artolak, baina dagoeneko partida galduta zegoen. Alegiarrak ez zion Ezkurdiaren jokoari nahi bezala erantzun ahal izan, eta tantoak amaitzerakoan ere ez zuen asmatu. "Txapeldun handi bat izan dut aurrean", esan zuen Artolak ETBri egindako adierazpenetan. "Ez daukat arazorik aitortzeko momentu honetan ni baino koska bat gorago dagoen pilotaria dela. Ahalmena badudala uste dut, baina une honetan ez nago bere mailan. Gaurko esperantza izan arren, kontuan izan behar dut ez nagoela nire unerik onenean: entrenamendu asko egin gabe nentorren, eta fisikoki-eta batere prestatu gabe. Egun kaskarra izan behar zuen berak, eta nik dena arriskatu eta atera, irabazi ahal izateko".

Ezkurdiak "oso zuzen" jokatu zuela eta tantoei "abiadura handia" sartu ziela, eta bera deseroso sentitu zela gaineratu zuen alegiarrak. "Denbora askoan egon naiz geldirik, eta denbora pixka bat gehiago behar dut nire jokorik onena harrapatzeko". Final-laurdenetako azken partida zen Artola eta Ezkurdiaren artekoa, eta, beraz, zehaztuta geratu dira finalerdiak: Jaka-Ezkurdia eta Bengoetxea VI.a-Altuna III.a. Asteburu honetan ikusiko da buruz buruko finala berriro errepikatuko den lau eta erdikoan.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!